ខេត្តព្រះវិហារ៖ នៅព្រឹកថ្ងៃទី០២ ខែតុលា ឆ្នាំ២០២៦ សាលាឃុំសង្កែមួយ ស្ថិតនៅក្នុងស្រុកឆែប ខេត្តព្រះវិហារ បានប្រកាស់ដាក់អោយមានដំណើរការដេញថ្លៃ នូវគម្រោងមូលនិធិឃុំសម្រាប់សាងសង់ផ្លូវបេតុងអារមេប្រវែង៤០៥ម៉ែត្រ ទទឹងដាក់លូកាត់ផ្លូវទោលអង្កត់ផ្ចិត០,៦០ម៉ែត្រប្រវែង៧ម៉ែត្រចំនួនមួយកន្លែងភ្លើងសូឡាចំនួន២០កន្លែងមានតម្លៃ ប៉ាន់ស្មានសរុបចំនួន២៧៨,៨៩៦,២០២៛(ពីររយជិតសឹបប្រាំបីលានប្រាំបីរយកៅសឹបប្រាំមួយពាន់ពីរយពីរៀលគត់)។
ប្រជាពលរដ្ឋអ្នកសង្កេតការណ៍បាននិយាយថា៖មុនពេលដាក់សំណើរដេញថ្លៃ ខាងមុខសាលាឃុំមានសភាពរញ៉េរញ៉ៃហាក់គ្មានសណ្តាប់ធ្នាប់ដោយកៀងគ្នាចុះកៀងឡើងទៅមុខទៅក្រោយ។ក្នុងស្ថានភាពនេះ គេឃើញមានក្រុមអ្នកសម្រុះសម្រួលដើរចរចារ ឃុបឃិត ប្រព្រឹត្តអំពើរពុករលួយ។ ក្រុមអ្នកចរចារទាំងនេះបានធ្វើការសម្រុះសម្រួលជាមួយក្រុមហ៊ុនអ្នកទទួលការផ្សេងៗទៀតដែលមានវត្តមាននិងមានសិទ្ធិក្នុងការដាក់សំណើរដេញថ្លៃ ដោយសន្យាផ្តល់ថវិកានៅក្រោយពេលដេញថ្លៃរួច។
ក្រុមហ៊ុនអ្នកទទួលការខ្លះបាននិយាយថាៈ ពួកគេត្រូវការបាញ់លុយចូលក្នុងកុងជាមុនសិនទើបពួកគេព្រមមិនចូលទៅដាក់សំណើរដេញថ្លៃ។ ក្នុងសភាពការនេះអ្នកទទួលការខ្លះក៏បានទទួលប្រាក់មុនដាក់សំណើរដេញថ្លៃ និងអ្នកខ្លះបានទទួលប្រាក់ក្រោយពេលដេញថ្លៃ រួច។
ប្រជាពលរដ្ឋអ្នកសង្កេតការណ៍ក្នុងកម្មវិធីដេញថ្លៃនេះបានអោយដឹងថា៖ នៅកន្លែងគណ:អធិបតីក្នុងសាលាឃុំមានការរៀបចំគណៈកម្មការលទ្ធកម្ម មានប្រជាពលរដ្ឋអ្នកសង្កេតការណ៍ប្រកបដោយរបៀបរៀបរយនិងមានសណ្តាប់ធ្នាប់យ៉ាងល្អ។ ក្នុងកម្មវិធីនេះមានវត្តមានលោក យិត សុធារ៉ា អភិបាលនៃគណៈអភិបាលស្រុកឆែប លោកនូ តារាប្ញទ្ធីនាយករងផែនការវិនិយោគខេត្តព្រះវិហារ និងលោក លាវ សុផលប្រធានគណៈ កម្មការ លទ្ធកម្មឃុំសង្កែមួយ។
ប្រជាពលរដ្ឋអ្នកសង្កេតការណ៍បានអោយដឹងទៀតថា៖ ក្រោយពេលគណៈកម្មការលទ្ធកម្មឃុំប្រកាស់នូវពេលវេលាអោយក្រុមហ៊ុនអ្នកទទួលការដាក់សំណើរដេញថ្លៃ ក្នុងពេលនោះមានចំនួន៤ក្រុមហ៊ុនបានដាក់សំណើរក្នុងនោះរួមមាន៖
១/ក្រុមក្រុមហ៊ុនស្រឿន វាសនា លោក អោ សុវណ្ណារ៉េតជាអ្នកដាក់សំណើរ ដាក់ក្នុងតម្លៃ២៦៨,៨០០,០០០៛(ពីររយហុកសឹបប្រាំលានប្រាំបីរយពាន់រៀលគត់)
២/ក្រុមហ៊ុនថេង រីតា លោក ឯម សានិតជាអ្នកដាក់សំណើរដាក់ក្នុងតម្លៃ ២៧១,៣៥០,០០០៛(ពីរយជិតសឹបមួយលានសាមសឹបប្រាំពាន់រៀលគត់)។
៣/ក្រុមហ៊ុនទេសចាន់ សុវណ្ណ លោក ទេសចាន់សុវណ្ណ ជាអ្នកដាក់សំណើរក្នុងតម្លៃ ២៧១,៤២៥,០០០៛(ពីរយជិតសឹបមួយលានបួនរយម្ភៃប្រាំពាន់រៀលគត)។
៤/ក្រុមហ៊ុនសៅ រ៉ាឌីខនស្រ្តាក់សិន លោក សៅ រ៉ាឌី ជាអ្នកដាក់សំណើរក្នុងតម្លៃ ២៧៣,១៨០,០០០៛(ពីររយជិតសឹបបីលានមួយរយប៉ែតសឹបពាន់រៀលគត)។
គណៈកម្មការបានសម្រេចទទួលយក ក្រុមហ៊ុនស្រឿន វាសនា ដែលមានតម្លៃ ទាបជាងគេទី១ ក្នុងតម្លៃ ២៦៨,៨០០,០០០៛(ពីររយហុកសឹបប្រាំលានប្រាំបីរយពាន់រៀលគត់)។
ក្រុមហ៊ុនដែលទទួលលុយតាមរយៈQRកូដ ពីក្រុមអ្នកចរចារពួកគេបានសន្យាថា បើការដេញថ្លៃបែក(មានន័យថាចុះតម្លៃទាបបំផុត) នោះក្រុមហ៊ុនដែលទទួលបានលុយពីអ្នកចរចារត្រូវបាញ់លុយនោះត្រឡប់ទៅម្ចាស់ដើមវិញ។
តាមរយ:ការចរចា ឃុបឃិត ស៊ុំគ្រលំប្រព្រឹត្តអំពើរពុករលួយនេះបានធ្វើថវិកាឃុំមានការខាតបង់យ៉ាងច្រើនពីការដេញថ្លៃដោយមិនស្មោះត្រង់នេះ។
មិនអាចស្នើសុំប្រតិកម្មពីក្រុមហ៊ុនស្រឿន វាសនា លោក អោ សុវណ្ណារ៉េតបានទេនៅមុនពេលចេញផ្សាយនេះ។
ករណីខាងលើនេះ ប្រជាពលរដ្ឋស្នើដល់ ឯកឧត្តម ទេសរដ្ឋមន្រ្តី ឳម យ៉ិនទៀងប្រធានអង្គភាពប្រឆាំងអំពើរពុករលួយ និងឯកឧត្តម សួស ប្រាថ្នា ប្រធានអគ្គនាយកនៃគណៈអគ្គនាយកដ្ឋានរដ្ឋបាលក្រសួងមហាផ្ទៃនិងជាប្រធានក្រុមការងារតាមដានត្រួតពិនិត្យ និងវាយតម្លៃលើកការរៀបចំ និងការអនុវត្តគម្រោងមូលនិធិឃុំ សង្កាត់ បើកការស៊ើបអង្កេតការប្រព្រឹត្តអំពើរពុករលួយក្នុងការដាក់អោយដេញថ្លៃ មូលនិធិឃុំសង្កែមួយ ប្រព្រឹត្តដោយក្រុមហ៊ុនស្រឿន វាសនានេះផង។
អត្ថបទនេះត្រូវបានធ្វើការចែករំលែកធ្វើជាចំណេះដឹងដល់ពលរដ្ឋ អ្នកសារព័ត៌មាន អាជ្ញាធរ និងស្ថាប័ន អង្គភាពមានសមត្ថកិច្ចពាក់ព័ន្ធ នានាចង់ស្វែងរកការពិត អង្គភាពសារព័ត៌មានយើងនិងធ្វើការសហការផ្តល់ឯកសារនិងភស្តុតាង បន្ថែមទៀតដល់អង្គភាពពាក់ព័ន្ធ បើមានការស្នើសុំ៕ រាយការណ៍ដោយ លោក ហេង សារុន