ឯកឧត្តម ឃួន ដាវិត ដឹកនាំកិច្ចប្រជុំត្រៀមរៀបចំសិក្ខាសាលាពិគ្រោះយោបល់លើសេចក្ដីព្រាងគោល ការណ៍ណែនាំ ស្ដីពីការគ្រប់គ្រងហិរញ្ញវត្ថុសាធារណៈរដ្ឋសភា

វិមានរដ្ឋសភា៖ ឯកឧត្តម ឃួន ដាវិត អគ្គលេខាធិការរង និងជាប្រធានក្រុមការងារកែទម្រង់រដ្ឋបាល សាធារ ណៈ នៃអគ្គលេខាធិការដ្ឋានរដ្ឋសភា នាព្រឹកថ្ងៃទី២១ ខែតុលា ឆ្នាំ២០២៦  បានដឹកនាំកិច្ចប្រជុំផ្ទៃក្នុង ដើម្បីពិនិត្យវឌ្ឍនភាពការងារត្រៀមរៀបចំ «សិក្ខាសាលាពិគ្រោះយោបល់លើសេចក្ដីព្រាងគោលការណ៍ណែនាំ ស្តីពីការគ្រប់គ្រងហិរញ្ញវត្ថុសាធារណៈ (FMM) រដ្ឋសភា, ការបូកសរុបលទ្ធផលការងារឆ្នាំ២០២៦ និងការផ្សព្វផ្សាយផែនការសកម្មភាពឆ្នាំ២០២៧»។
កិច្ចប្រជុំនេះ មានការអញ្ជើញចូលរួមពី ឯកឧត្តម កៃ កេតនិន អគ្គនាយកនៃអគ្គនាយកដ្ឋាននីតិកម្ម និងស្រាវជ្រាវ ព្រមទាំងក្រុមប្រឹក្សាអ្នកច្បាប់ និងមន្ត្រីជំនាញពាក់ព័ន្ធជាច្រើនរូប។
អង្គប្រជុំបានពិភាក្សា និងវាយតម្លៃលម្អិតលើទិដ្ឋភាពសំខាន់ៗនៃការរៀបចំ រួមមាន៖
– ការកែសម្រួលខ្លឹមសារនៃរបៀបវារៈអោយមានលក្ខណៈត្រឹមត្រូវគ្រប់ជ្រុងជ្រោយ
– ការកំណត់សមាសភាព និងចំនួនប្រតិភូចូលរួម
– ការរៀបចំផ្នែកបច្ចេកទេស ការងារភស្តុភារកម្ម និងទីតាំងប្រព្រឹត្តទៅនៃកម្មវិធី
សូមបញ្ជាក់ថាការរៀបចំសេចក្ដីព្រាងគោលការណ៍ណែនាំ ស្តីពីការគ្រប់គ្រងហិរញ្ញវត្ថុសាធារណៈ(FMM) រដ្ឋសភានេះ ធ្វើឡើងក្នុងគោលបំណងកសាងសៀវភៅណែនាំនីតិវិធីស្តង់ដា ក្នុងការគ្រប់គ្រងការងារថវិកា  ទ្រព្យសម្បត្តិរដ្ឋ សវនកម្ម និងអធិការកិច្ច ឱ្យកាន់តែមានតម្លាភាព គណនេយ្យភាព និងប្រសិទ្ធភាពខ្ពស់ ស្របតាមច្បាប់ និងបទដ្ឋានគតិយុត្តជាធរមាន។
សិក្ខាសាលានេះ ក៏ស្ថិតក្នុងក្របខ័ណ្ឌដំណាក់កាលទី៤ (២០២៣-២០២៧) នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាល ដែលផ្តោតលើ «គណនេយ្យភាពចំពោះសមិទ្ធកម្ម» ព្រមទាំងស្របតាមទិសដៅកែទម្រង់រដ្ឋបាល សាធារណៈរបស់រដ្ឋសភាផងដែរ។
សិក្ខាសាលាពិគ្រោះយោបល់នេះ គ្រោងនឹងប្រព្រឹត្តទៅរយៈពេល ២ថ្ងៃ ចាប់ពីថ្ងៃទី២៦ ដល់ថ្ងៃទី២៧ ខែតុលា ឆ្នាំ២០២៦ នៅសណ្ឋាគារសុខា ខេត្តព្រះសីហនុ៕

ប្រភពរដ្ឋសភា៖