មន្ត្រីសាធារណៈ និងអ្នកសារព័ត៌មាន មិនគួរខ្លាចការរិះគន់ឡើយ

បទអត្ថាធិប្បាយ
ដោយ មឿន ឈានណារិទ្ធ
(សាស្ត្រាចារ្យផ្នែកសារព័ត៌មាន)

នៅក្នុងសង្គមប្រជាធិបតេយ្យ មន្ត្រីសាធារណៈដែលឡើងកាន់តំណែង ត្រូវតែរំពឹងទុក និងស្វាគមន៍ចំពោះការត្រួតពិនិត្យ ការវាយតម្លៃ និងការរិះគន់ពីសាធារណជន ជាពិសេសពីអ្នកសារព័ត៌មាន។ នេះជាផ្នែកមួយនៃគណនេយ្យភាព និងតម្លាភាព ដែលជាមូលដ្ឋានគ្រឹះនៃអភិបាលកិច្ចល្អ។

ជាការពិត ការត្រួតពិនិត្យ ការវាយតម្លៃ និងការរិះគន់ពីសាធារណជន និងអ្នកសារព័ត៌មាន មិនមែនមានគោលបំណងវាយប្រហារ ឬបង្ខូចកេរ្តិ៍ឈ្មោះមន្ត្រីសាធារណៈនោះទេ។ ផ្ទុយទៅវិញ ប្រសិនបើការរិះគន់ធ្វើឡើងដោយផ្អែកលើការពិត និងក្នុងស្មារតីស្ថាបនា វាគឺជាកម្លាំងជំរុញឱ្យមានការកែលម្អ និងការអភិវឌ្ឍ។

ខុសពីការបរិហារកេរ្តិ៍ដែលផ្អែកលើព័ត៌មានមិនពិត ឬការចោទប្រកាន់ដោយគ្មានមូលដ្ឋាន ការរិះគន់ក្នុងន័យស្ថាបនា មានគោលបំណងជួយលើកកម្ពស់ប្រសិទ្ធភាពការងារ កែតម្រូវភាពអសកម្ម ភាពមិនប្រក្រតី និងចន្លោះខ្វះខាតនានា ដើម្បីឱ្យមន្ត្រីសាធារណៈអាចបំពេញភារកិច្ចបម្រើប្រជាពលរដ្ឋបានកាន់តែល្អប្រសើរ។

ដូចគ្នានេះដែរ អ្នកសារព័ត៌មាន ក៏គួរតែរំពឹងទុក និងស្វាគមន៍ការត្រួតពិនិត្យ ការវាយតម្លៃ និងការរិះគន់ពីសាធារណជន និងពីមន្ត្រីសាធារណៈផងដែរ។ វិជ្ជាជីវៈសារព័ត៌មាន ក៏ត្រូវការការឆ្លុះបញ្ចាំង និងការកែលម្អជាបន្តបន្ទាប់ ដើម្បីរក្សាបាននូវគុណភាព និងទំនុកចិត្តពីសង្គម។

ការរិះគន់ដែលប្រកបដោយសុចរិត និងស្ថាបនា អាចរួមចំណែកលើកកម្ពស់វិជ្ជាជីវៈសារព័ត៌មាន តាមរយៈការតម្រង់ទិស និងការលើកទឹកចិត្តឱ្យអ្នកសារព័ត៌មានគោរពក្រមសីលធម៌វិជ្ជាជីវៈ និងអនុវត្តតួនាទីរបស់ខ្លួនដោយទំនួលខុសត្រូវ។

អាស្រ័យហេតុនេះ ទាំងមន្ត្រីសាធារណៈ និងអ្នកសារព័ត៌មាន មិនគួរខ្លាចការរិះគន់ឡើយ ប្រសិនបើការរិះគន់នោះធ្វើឡើងដោយស្មោះត្រង់ ផ្អែកលើការពិត និងក្នុងគោលបំណងស្ថាបនា។

ផ្ទុយទៅវិញ ភាគីទាំងពីរគួរមានការអត់ធ្មត់ អធ្យាស្រ័យ និងគោរពគ្នាទៅវិញទៅមក ដោយចាត់ទុកការរិះគន់ជាឱកាសសម្រាប់ការកែលម្អខ្លួន ដើម្បីរួមចំណែកបម្រើប្រជាពលរដ្ឋ និងអភិវឌ្ឍសង្គមឱ្យកាន់តែរីកចម្រើន។